الكلدان الآشوريون السريان شعب واحد  يسمى بالشعب الآرامي

ليلى لطّيليلى لطّي مختارة سد البوشرية

شو مشكلة اللغة العربية معنا وشو مشكلتنا مع اللغة العربية؟!!!

كأنو بين اللبناني واللغة العربية في غبن،،، ما في تجانس،،، في حالة رفض بيناتن بتشبه لحد ما الطلاق.

ليش ياترى؟!!! شو سبب هالجفا بيناتن!...

مش يمكن لأنو اللغة العربية منّا لغتنا الاساسية مع انّا تبنيناها وما وصلتلنا بالقوة.

مش يمكن لأنها بتفرض هويتها علينا ونحنا بداخلنا رافضين هالشي.

ما بقدر افهم شو هالتوأمة ما بين اللغة العربية والهوية العربية وليش ه

يدي العلاقة مش موجودة الا عند العرب؟!!!

مثلاً ليش ما حدن بيقول عن الاميركاني انكليزي مع انو لغتو انكليزية...

وما حدن بيقول للبلجيكي فرنسي مع انو بيحكي فرنسي...

او الاوسترالي انكليزي او السويسري .... او النمساوي....

الا هون عنا بالشرق بدُّن يفرضو عالكل العروبة مع انو كتار منن مش عرب والامثلة كتيرة... مثلا شو يعني الجمهورية العربية السورية كيف سورية وكيف عربية بذات الوقت ما اسما لحديت اليوم الشام (دمشق) ......... الخ....


مش رح نحكي تفاصيل اكتر ومش رح نقول امثلة اكتر موضوعنا هو لبنان... ليش ما فينا نكون لبنانيين وبس نسبة الى لبنان وهويتنا لبنانية بس...

بكل بساطة ليش بدنا ناخد هوية ما بتشبهنا هوية مش لإلنا ليش بدنا نمحي حضارة آلاف السنين ولغة جدودنا لغة الشرق كلو( بنقصد هون اللغة الآرامية-السريانية) هيدا ما بيعني انو نتخلى عن اللغة العربية ولكن ما نتقمّص هوية هي أصلا منا لإلنا. بيسوا نكون عم نحكي عربي وندرس عربي بس ما ننكر هويتنا.

يا عمّي اذا الزعيم العربي التاريخي الاقوى جمال عبد الناصر ما قدر يخلق وحدة عربية بين الدول العربية ، ليش اليوم الكل بلبنان وبباقي دول الشرق الاوسط ما عندن هم الا تثبيت عروبة لبنان؟!!!

يا ترى ليش، شو هالسر اللي ما عم نقدر نفهمو! هل ما بقى للعرب او ما في عند العرب اي شي اي رصيد الا التسمية؟!!! هل هالقد في افلاس ثقافي وانساني وسياسي وتاريخي وحضاري عندن؟!!!

او هي امتداد لخلافة زالت واندثرت...

هل ما بقى في ارث... هل فشلت كل الانظمة فوصلنا لهون وصلنا لمرحلة اما تكون عربي او انت خاين وعميل و ........... ما بعرف شو........

ليش هالخوف يا ترى من لبننة اللبنانيين؟!!!

ما خلص اللغة العربية ترسخت بمجتمعنا بحياتنا مع انو كتار منّا ما بيحكو عربي مع ولادن مش لأنو الاجنبي لغة اجمل او اسهل او دارجة او "موضة" مش صحيح هالشي بس لأنو بذاكرتنا الدفينة بنحس انو نحنا مش عرب وبنشوف انو الفرق بين الحكي اللبناني والعربي كبير مثلاً في كتير كلمات منا عربية كلمات سريانية متل الهمزة مثلاً مش موجودة باللبناني لأنو بالسرياني ما في همزة بنقول ماي مش ماء مرا، راس، بير، ريّس .....

نحنا بنحكي سرياني معرّب ومش عربي...

لأنو قد ما قدرو يمحو ذاكرتنا بيبقى الكلام شاهد متل الآثار الحجرية ما في شي بيمحيا ... هيدي حقيقة هيدا تاريخ ما لازم نخبّيه او ننساه او نغيرو او نساير التانيين نساير اللي حوالينا يللي مصرّين عالعروبة مع انو الاكترية منن مش عرب بس ما بدن يعرفو هالشي
بيكفي نقول انّا لبنانيين وبس لبنانيين بنحكي عربي بس مش عرب

المقالات التي ننشرها تعبر عن آراء أصحابها ولا نتحمل مسؤولية مضمونها