مكتوب منظمة سومِخ للقوات اللبنانية

منظمة التضامن مع مسيحيين الشرق الأوسط سومِخ (SOMEK) بتتمنّى للقوات اللبنانية مؤتمر أوروبي موفّق وبتحبّ توصّل لها الرسالة هيدي:

بما إنوّ نحنا منعرف مين القوّات اللبنانية و مين أسسها ولأي هدف، منحبّ نشدّد للمؤتمر دعمنا الكامل للقوات اللبنانية الحقيقية المتمثلة بالمقاومين ولاد الشعب المسيحي يلّي قررو متابعة المقاومة تا يحصل الشعب المسيحي عا حقوقو. ولها السبب منحبّ نأكّد دعمنا على أساس النقاط التالية:

1-     الإيمان بلبنان الشعب المسيحي: سومِخ مقتنعة، متل مؤسِس القوات الشهيد البطل القايد بشير الماروني السرياني يلّي قال "بدنا لبنان يكون لإلنا، ولغيرنا إزا بدّو"، إنّو سبب وجود لبنان كدولة مستقلّة هو حاجة المسيحيين لكيان حر ومستقل. وبدون هالسبب ما كان في شي بيبرّر استقلال لبنان. والإسبات الواضع هو إنو ما حدا ضحّى قد المسيحيين لخلق استقلال لبنان والمحافظة عليه.

2-     الإيمان بلبنان الآرامي: الشعب المسيحي بلبنان بدون هويتو القومية الآرامية بيكون لقمة هينة بوجّ الطروحات القومية كلاّ من عروبية أو سورية أو غيرها. الهوية الآرامية حافظو عليها المسيحيين بأقدس محلّ عندن: بالكنايس والإيمان. مين بيعطينا الحقّ إنو نتخلاّ عنها؟ غير الخَوَنة يلي بدّن يلغونا من التاريخ تا يلغونا من الجغرافيا.

3-     الإيمان بلبنان التعدّدي: لبنان بوجود المسلمين فيه لازم يتبنىّ شكل الدولة التعددية. كل حلّ تاني بيكون هدفو يلغي فريق من التنَين. أصحاب شعار "لا غالب ولا مغلوب" بيكونو كزّابين منافقين إزا ما بيقبلو بالتعدّدية.

4-     المقاومة العنيدة: ما حدا بيحقّ لو يعلن انتهاء المقاومة المسيحية طالما حقوق المسيحيين مش واصلتلون على شكل كيان سيّد حر ومستقل، بيقرّرو فيه المسيحيين مصيرُن وبيحصلو عا كرامتُن بدون انتقاص.

وعدنا للقوات اللبنانية منطلق من قناعاتنا بمهمتها القومية يلّي منتمنى إنّها تتحقق تحت قيادة قومية مسيحية شريفة، ومنتمنى للقوات اللبنانية تسترجع صليب المقاومة وترجع تسترجع قيادتها من حبوس الإحتلال العروبي البعثي وعلى راسُن الدكتور سمير جعجع ورفاقو بالنضال المسيحي اللبناني.

سومِخ     

أمانة السرّّ  

يوسِف سَوك