نزلت خيول المجد

بقلم انيس زبيدي

نِـزلِت خيول المجْـدْ طول وعَرْض

نـِـزلت تـردّ الشـرَف والعَرْض

وطير الما بدّو يـنـفـُـض جْـناحـــــو

وْيـنـتـِفِض بـيضلّ إبْنْ الأرْض

-----------------

وهالعاصفـِـة الله عطاهـــــا الأمْر

تِطلعْ، وطلعِت تــاتـــــــــردّ العِمْرْ

وصارت تـشـتــّي رْماد بعيونـن

وكلما الرماد يْـطيــْرْ يحمَى الجَمْرْ

-----------------

والموقدة كانت بحاجـــِــــة لـْـقوت

وعم يطعموها عَيـنـك وعـَيـنـــي

وغصون خضرا مـا بْـيسوا تموت

وعم يعملو مْنِ اليابس جْــنـيـنـي

-----------------

غصون خـضرا يــــفرزوها فرْز

وبمَوقدِة حِقــــدُن اندرزت درْز

ولو تعرفوا من ويــــن قـصّوهــا

قـصّـوا زنودا عن كْـتاف الأرْز

-----------------

هالأرزة الصاروا يـــِـجــِرحوهــــــا

ويـنـتــّـفـو كـْروزا ويـِحـِلـْـشوها

صارت شلوشا تـشِقّ قلب الصْخــْرْ

وتوقف بــــــــــوجّ العَمْ يهزوها

----------------

وقـت اللي برْدِت وَلــّعــُــــــــو لـْـحافــــا

وجات تحكي قطـّـبـو شــْـفافــــــا

ووقـت اللي صاروا كــْـتـافـها بــْـلا زنود

الإم الحنونـِـة غطــّت كـْـتافـــــــا

---------------

وْبلــّـش يْـقردح غصنهــا الدبــــــــلان

وتدعس ع رقبـــــة مارد الحرمان

وكيف مش رح ترجــــــــــع وتـخضرّ

مـــــــــا دام غطــّوها بْعـَـلم لبنان

---------------

ومن قبل كان الطير كلمـــــــــا لاح

وْجـرّب على غِصْن الأرِز يرتـاح

يعلق ع دبْق يشلــّـحــــو رْياشــــــــو

ويرجـّعو عم يزحف بْـلا جــْـنـاح

--------------

وهلــّــق حمامِة غــطـّـت وْمن دون

مــــــــا يكون قلبا للغِرِب مرهون

شالــــِــــــــــت بمنقادا غِصِن برّي

وحطــّت مْحلــّو غِصِـن زيتــون

--------------

هالأرزة الْ شلشــا صرخ عطشـان

رح نجــبـرو يصرخ صِـرِت شبعان

ودمّ الشهيــــــــــــــد الكان بالميدان

مــــن فـــــوقها ومــــن تحتها مليان

وْكانت مِتِل كـــــلّ الشجَرْ شجْــرَة

صــــارت بإيدينــــــا عـَــلــَـمْ لبنان

نيويورك سيتي

iloveyoulebanon@hotmail.com

الشاعر المغترب انيس زبيدي